Kandayu Alem Uluh Handak Manugal

1. Ayu Itah Sama Nganderang
Ranying Hatalla Ije Ingguang
Ngandayu Mandurut Raja Hakanduang
Ngaragan Bukit Kangantung Gandang

3. Andau Te Kia Hatuen Jatta
Babalang Bulau Lampang babala
Ie Dumah Palus Umba
Ngajadian Parei tumun sarita

5. Palus Raja dumah Manimang
Nyarantang Panuhan Uka Kanahuang
Paharing Awi Selung Tamanang
Basaluh Manjadi Parei Nyangen Tingang

7. Kalute Tanturan Tumun sarita
Ie Hadurut hayak Kuasa
Panjanjuri Hayak Paseban Raja
Hadurut Hayak Lambang Palangka

9. Ikau Tuh Parei nyangen Tingang
Andau Tuh Tinai Bitim Halisang
Naga Hai Mahi ingguang
Tuah Rajaki Uras Ingguang

11. Putir Baupak Amas Misik Hagatang
Mamua Bulau Intan Je Lenda-lendang
Tarung Bitim Ayun Hakumbang
Pampeteh Hatalla Katika Usang

13. Palin Parei Je Nyangen tingang
Supak Dare Ela Nantuwang
Sarangan Behas Je Ela Buang
Danum Kayu Je Ela Kurang

15. Kakulas Katehu ela Ihapa
Mangat Rajaki Je Rajin Maja
Itah ela Kalahi Kajama
Kahiri Nganan Je Paut Ela

17. Are Sarat Ije Ihapan
Ma-amal Sinta Jite Pedoman
Peteh Hatalla Tege Insanan
Huang Kitab Je Panaturan

19. Hormat Umba Je Indang Apang
Mangat Batuah Baumur Panjang
Tundah Kula Uras Inyayang
Nyarurui Pelek indang Sangumang

21. Basarah ngandayu Paham Baguna
Amal Balum Huang Dunia
Kitab Panaturan Rajin Imbasa
Auh Kandayu Uras Irima

23. Hajamban Kandayu Tuh Itah nganderang
Balaku tarung Itah Hagatang
Hajamban Kandayu tuntang Kanderang
Balaku Hatalla Manenga Kasanang

2. Tamparan Parei Nyangen Tingang
Tuntang Pulut Lumpung Penyang
Gaduhan Putir Selung Tamanang
Nangkaluma Awi Raja Angking Penyang

4. Limbah Te Ewen Kapeleng Renteng
Nyapenda Garing Kapandereh Renteng
Intu Bukit Rundung Kereng
Saluruh Raja Uras Kampeleng

6. Eweh Kalunen Dia Mangganang
Behas Parei Nyangen tingang
Ie Dia Baumur Panjang
Rajaki Tapas Belum Kurang

8. Ie Hadurut Akan Dunia
Due Pampeteh Ie Mahaga
Nyalamat Kalunen Buli Hatalla
Intu Lewu-Lewun Kuasa

10. Putir Bahuti Amas Haguet Maja
Uju Andau Ie Batapa
Abu Basar Jadi Nyadia
Amas Intan Akan Inenga

12. Tarung Bitim Sahpus Dunia
Nanjiri Bulau Je Pungkal Raja
Tingang Kampeleng Tambun Hasupa
Ngatah Bitim Hadurut Maja

14. Tinai Belum Ela Panyapa
Ela Mangutuk Je tundah kula
Kabisit Kakuhu Inganan Rata
Kajenta Kajurah Jite Ihapa

16. Tuntang Tinai Je Ela Laya
Kahalap Karasih Uras Ihaga
Rasih Uras Taluh Je Papa
Jamban Mamarit Sangumang Maja

18. Are Sarat Ije Ingguna
Mangat Rajaki Dumah Maja
Komi Tatawe Hayak Bajenta
Rajin Nyarungan Tamuei maja

20. Basarah Ngandayu Rajin Umba
Manara aran Ranying Hatalla
Panaturan Kandayu Nggau ihaga
Jamban Mandinu Berkat Hatalla

22. Tikas Tuh Helu Auh kandayu
Hajamban Basarah tuh Itah balku
Dengan Ranying Hatalla ngambu
Uka Basarah Tuh Tatau Baramu

Kandayu Metuh Mangubur

1. Ayu Itah Sama Manarang
Janjin Ranying Hatalla Usang
Liau Kaharingan Kanesek Layang
Raja Entai Nyahu Tege Manambang

3. Amun Tarung Jadi Lampang
Ikau Misik Bara Tiruh Tingang
Nalian Lanting Ije Ingguang
Inggaduh Awi Je Indu Rangkang

5. Lewu Tatau Lewu Hai
Hai Pahalendang Hayak Rami
Tokiu Lahap Hayak Barami
Kanjan Tari Baganti-Gati

7. Kalute Itah Jadi Katawan
Ranying Hatalla Jadi Mansanan
Lewun Hatalla Uka Nyahukan
Nyaring Panyalaya Dia Katawan

9. Awang Susah Hete Sanang
Lewu Tatau Akan Ingguang
Hete Tarung Kalunen Lampang
Lewun Kuasa Uka Kasanang

11. Tarantang Nule Balaku Asi
Terai Bakanduang Rutas Pali
Kalunen Handiai Hatue Bawi
Balaku Inengan Tuah Rajaki

2. Pasahan Raung Jadi Ingguang
Uka Tarung Tau Lampang
Manunggu Duhung Mama tandang
Imbit Talawang Jambu Bahandang

4. Indu Rangkang Bakas Lewu
Jamban Liu Liaung Sangkalemu
Jamban Buli Lewu halu
Nyenguk Liang Ije Kajanjulu

6. Kalute Karamin Lewun Hatalla
Akan Kalunen Jadi Sadia
Aluh Jipen Atawa Raja
Uras buli Lewun Hatalla

8. Intu Hete Uras Hanjak
Pambelum Taheta Uka Kahanjak
Lewu Tatau Jadi I-andak
Ranying Hatalla Jadi mangilak

10. Tikas Hetuh Rawei Manarang
Manarang Janjin Hatalla Usang
Balaku Tarung Nule Lampang
Bakandung Bulau Je Untung Panjang

12. Ikei Laku Tuah Rajaki
Jatta Nanggera Hatalla masi
Bakas Tabela Hatue Bawi
Kuruk Hambaruan Ikei Buli

Kandayu Limbah Tiwah

1. Itah Niring bulau Mandurut
Jamban Kandayu Bahing Karungut
Peteh Nyai Je Inai Mangut
Parit Balanga Je Runjan Riwut

3. Hete Uka Kalunen Balaku
Raja Kameluh Je Intu Ngambu
Basarah Limbah Je Ngentang Nyahu
Mangat Basuang Je Gantang Uju

5. Gawi Hai Je Jadi Gitan
Akan Kakare Ungkup Babuhan
Lampang Tarung Je Kaharingan
Kilat Mamancar Kilau Bulau Hintan

7. Awi Pasin Ranying Hatalla
Halalian Itah Bara Dunia
Bele Kalunen Hayang Mananya
Tiwah tingang Tatap Ihaga

9. Gawi Hai Je Jadi Gitan
Palampang Tarung Itah Kaharingan
Malalus Peteh Hatalla Huran
Akan Suntu Andau Harian

11. Are Pesta Huang Dunia
Pesta Tiwah Jatun Mayama
Ampie Rami Dia Lalangena
Tau Mantehau Kalunen Maja

13. Sampai Tuh Helu Auh Kandayu
Basarah Limbah Je Ngentang Nyahu
Dengan Hatalla Itah Balaku
Akan Kaharingan Tatau Baramu

2. Itah Palus Bahing Timang
Namuei Bukit Kangantung Gandang
Raja Ngambu Ije Ingguang
Mahaga Panatau Je Kayu Erang

4. Gawi Hai Paham Baguna
Manmpung Tingang Je Ngaju Ngawa
Kalunen Pamggil Tambun Hasupa
Nangkenya Nalatai Lunuk Mamua

6. Gawi Hai Dia Ihitung
Akan Kaharingan Palampang Tarung
Lewu Tatau Ije Nanturung
Raja Ngambu Manyambung Untung

8. Tinai Karugi Ela Ingganag
Kaharingan Belum Tarung Lampang
Lewu Tatau Ije Ingguang
Uka Pambelum Sapanja-panjang

10. Hete Itah Jadi Manyaksi
Ranying Hatalla Kuasa Hai
Pesta Tiwah Te Ampie Rami
Patut Irima Gagenep Biti

12. Uras Jadi Itah Katawan
Asin Ranying Hatalla Huran
Masi Kaharingan Ije Bara huran
Bara Tunggul Garing Je Janjahunan

Kandayu Uka Uluh Matei

1. Hetuh Itah Sama Manarang
Janjin Ranying Hatalla Huran
Ela Mikeh Hayak bimbang
Jalahan Itah Je Jadi Layang

3. Itah Belum Huang Dunia
Kilau Huang Randung Banama
Dimpah Tasik Galumbang Bahaya
Bereng Kiamat Tuntang Isi Daha

5. Itah Ela Geger Mahakan
Pampatei Ampie Jite Jamban
Ranying Hatalla Ampi Manduan
Lewu Tatau Uka Tujuan

7. Lewu Tatau Lewu Hai
Uka Hatalla Jadi injanji
Uka Bakumpul Barami-Rami
Lewu Pambelum Ije Katatahi

9. Itah manyarah Ela bimbang
Ranying Hatalla Ije Ingguang
Itah Susah Laku Sanang
Tarantang Nule Tarung Hagatang

11. Tikas Tuh Helu Rawei kandayu
Mansanan Janjin Hatalla Ngambu
Peteh Hatalla Katika Helu
Tarantang Nule Ela Manyalu

 

2. Ampin Kalunen Sia-sia
Biti Bereng Hayang Mananya
Sial Hai Jadi Inyupa
Akan Itah huang Dunia

4. Kalunen Bapikir Ela Sala
Janji Sampai Dengan Hatalla
Kalunen Dumah Awi Kuasa
Haluli Tinai Buli Kuasa

6. Hetuh Itah Tinai Manarang
Janjin Ranying Hatalla Usang
Ie Jeha Tege Manambang
Huang Lewu Tatau Uka Kasanang

8. Itah Uras Jadi katawan
Asin Hatalla Katika Huran
Genep Ie Jadi mansanan
Akan Kalunen Rata Katawan

10. Tikas Hetuh Riwut Rawei
Basarah Penyang Je Hinje Simpei
Inyimpei Indehen Je Huang Atei
Janjin Hatalla Jadi Penyang Karuhei

12. Awi Harian Andau Jeha
Uras Kalunen Sama Rata
Uras Matei Buli Hatalla
Lewu Tatau Uka Itah Hasupa

Kandayu Akan Uluh Ije Handak Tiwah

1. Ayu Itah Sama Nganderang
Manyampai Hatalla Patut Ingganang
Hajamban Basarah Tuntang Nganderang
Itah Mansanan Handak Tiwah tingang

3. Itah Balaku Sahur Parapah
Uras Hadurut Pahayak Itah
Uka Mahaga Katika Tiwah
Tuntang Hatalla Tau Masi Itah

5. Gawin Tiwah Paham Baguna
Berkat Hatalla Gitan Babala
Ulih Mantehau Kalunen Maja
Palampang Tarung Sewut Sarita

7. Tiwah Manulak Je Rutas Pali
Sial Kawe Dia Manggapi
Nukep Uras Tuah Rajaki
Ranying Hatalla Hadurut Masi

9. Ampin Asin Ranying Hatalla
Lalian Kalunen Bara Dunia
Bele Kalunen Hayang maknanya
Tiwah Tingang Tatap Ihaga

11. Gawin Tiwah Dia Babehat
Amun Kalunen Ngatawan Hakekat
Hajamban Tiwah Hatalla Mamberkat
Majar Kalunen Uka Tau Pakat

13. Hete Itah Kareh Manyaksi
Hatalla Parahan Kuasa Hai
Pesta Tiwah Te ampie Rami
Patut Ingumang Gagenep Biti

15. Hete Itah Kareh Katawan
Asin Ranying Hatalla Gitan
Masi Kalunen Je Bara Huran
Bara Tunggul Garing Janjahunan

17. Tikas Tuh Helu Auh Kanderang
Mansanan Handak Je Tiwah Tingang
Balaku Tarung Itah Hagatang
Tuah Rajaki Je Uras Lampang

2. Hajamban Basarah Tuntang Ngandayu
Itah Mansana Salabih Helu
Intu Luwuk Kampungan Bunu
Itah Handak Ngentang Tiwah Bunu

4. Balaku Dengan Jatta Sangiang
Ijin Pampahilep Patahu Antang
Saluruh Parapah Uras ingganang
Uka Mahaga Metuh Tiwah Tingang

6. Katika Tiwah Itah Mamali
Ela Kaboho Ela Kalahi
Pakat Bulat Hatue Bawi
Mangat Ranying Hatalla Masi

8. Gawin Tiwah Ela Ihitung
Mangat Itah Hagatang Tarung
Lewun Hatalla Ije Nanturung
Ranying Hatalla Mamberkat Itung

10. Tinai Karugi ela Ingganang
Mangat Tarung Tau Hagatang
Lewu Tatau Ije Ingguang
Eka Pambelum Sapanja-Panjang

12. Gawin Tiwah Te Kareh Gitan
Palampang Tarung Haring Kaharingan
Malalus Peteh Hatalla Huran
Akan Suntu andau Harian

14. Are Pesta Huang Dunia
Pests Tiwah Jatun Manyama
Ampie Rami Dia Lalangene
Tau Mantehau Kalunen Maja

16. Awi Kalunen Huang Dunia
Aluh Je Menteng Tuntang Balinga
Jatun Ati Ije Kuasa
Nyalamat Kalunen Tikas Hatalla