Manggaru Sangku Tambak Raja

 

Nggaru manyangku sangku kapanatau tambak raja ije bahalap basuang behas parei manyangen tingang,
hayak ingarambang hapan giling pinang hambalat awi rukun tarahan,
basingah bulau pungkal raja rabia tisik tambun,
ije bahalap ineras hapan bulau hambaruan ije bangkusan timpung.
Maluhing hapan dandang tingang ije kadandang tuh inyarah ikei
akan Ranying Hatalla Langit,Tuhan tambing kabanteran bulan, Raja tuntung matan andau.
Basa bitim hai kuasam belum datuh japa jimat maharing.
Mangat kare kahandak ikei uras tau manjadi kilau gawim junjun helu huran
ije manjadian sahapus batang danum injam tingang rundung nasih nampui burung.
Uka behas bulau hambaruan ije mungkus huang bangkusan timpung tau hariten nduan hila upun tundue barintih nduan halawu benteng.
Kuruk Hambaruan Ikei,

Sahiy Sahiy Sahiy

 

Versi audio

Vocal = NN / Rabiadi (katanya) – dapet dari HP temen

Advertisements

Doa Kuman / Makan

 

 

Inanjuku bahing ganan tandak balua bulau pantar tatah bahanjung rabia sadurin guntum, bahi-bahing panganak andau palua parung hai malabehu benteng siru datuh marantau ruang jegantung pahalendang tinggi pahalingei.

Bambahingan panyandai bulan nehus siru sari pangku palus nyalumbu ambun tilap telu puluh manangkawet enun lime balas hatalamping tapuk tasik kapanjungan manjung halawu tumbang lawang langit, palus sembang balai bulau napatah hintan balai hintan napatah bulau Sali padadusan Ranying Hatalla.
Bau Ambun Andau/Hamalem tuh ikei jadi tingang hakapeleng renteng tambun randan hapampungan lingkat mijen bentuk parung hai malabehu benteng siru datuh marantau ruang ayun keluarga …………….

Ije jadi manyadia rangkan panginan simpan iran panyambungan sukup tuh, uka Tingang Tatu Ranying Hatalla mujan danum nyalung kaharingan belum natisen guhung panaling aseng, mujan sangka tatamba, panerus untek panarang atei parentas rawei paharus jalan parajang hukum, mangat Ikei kanan rangkan panginan simpan iran panyambungan sukup tau manjadi akan karigas ka-abas, batekang tulang, kapintar harati, sanang mangat sanang salamat belum huang pantai danum injam tingang rundung nasih napui burung, awi tagal kahain kuam jatun bara tikas kuasam, kueh bitim tau rise rawei palakuan awat hamaring balitam kuasam ela basuleh huang awi bitim jadi inanggare Indu Rangkang Panekang Tulang, Mina Runting Paniring Uhat, Indu Lambung Panunjung Tarung Mina Timpung Payun Rawei, Putir Sinta Rantaian Ganan Behas. Taraselem intu Rangkan Panginan Simpan Iran panyambungan Sukup, Manyukup Hagagian Katapas tuntang kakurang Ikei.
Dia Panjang Riwut Rawei Hajamban Bahing Ganan Tandak Isen Ambun Saruhin Tisui babalang labatan ganan kandayung nyuruk rabia sadurin guntum ruwan junjun helu hajamban Kuasan Tingang tatu Ranying Hatalla Ikei Balaku.

SAHIY.

Ref: Buku Kandayu (Telatah Basarah)

Doa Tamparan Basarah

 

 

Inanjuriku ganan tandak balua bulau pantar tatah bahanjungan rabia sadurin guntum,bahi-bahing panganak andau balua parung hai malabehu benteng siru datuh ije marantau ruang,ije gantung pahalendang tinggi pahalingei.
Bambahingan panyandai bulan nembus siru sari pangku palus nyalumbu ambun tilap telu puluh manehus enun lime balas hatalamping eleh tapuk tasik kapanjungan manjung halawu tumbang lawang langit.

Palus ganan tandak buah tasik malambung bulau harende laut bapantan hintan palus nanturung balai hintan napatah bulau Sali padadusan Ranying Hatalla Langit ije hai kuasae belum datuh japa jimat maharing.
Kangkarungut ganan tandak janjaruman karang lingun ikei tingang esum pantai danum kalunen nalatai tisui luwuk kampungan bunu bau ambun alem tuh ikei tingang ere hakampeleng renteng tambun randan hapampungan lingkat mijen huang parung hai malabehu benteng siru datuh marantau ruang.

Basa ikei manaharep tuntang manyarah kapanatau Sangku Tambak Raja ije gantung pahalendang tinggi pahalingei ije basuang behas Ba-asal Bara Parei Manyangen Tingang bahalap ngarambang hapan giling pinang ihambalat awi rukun tarahan hayak ineras bulau hambaruan ije bangkusan timpung basingah bulau pungkal raja rabia tisik tambun.
Bahalap maluhing dandang tingan ije kadandang inyarah ikei hapan do,a basarah ikei hapan ikei balaku asi belum palakuan awat maharing dengam ije puna hai kuasam datuh japa jimat maharing ije mahunjun bara raja awang beken.
Kanahuang ku tinai Ranying Hatalla Langit Tuhan Tambing Kabanteran Bulan Raja Tuntung Matan Andau pahaya ikei tuntang kilau gawim ije jadi manjadian taluh handiai huang sahapus kalunen junjun helu huran.

Ngatah ku tinai Ranying Hatalla Langit Tuhan Tambing Kabanteran Bulan Akam mujan danum nyalung kaharingan belum natisan guhung panaling haseng akan ikei handiai. Mangat kare ikei handiai sama tau belum panjang umur batuah marajaki huang batang danum injam tingang rundung nasih nampui burung, belum sanang mangat sanang salamat.
Uka ikei tau penyang hinje simpei paturung humba tamburak mangat ikei tau tanggeran lewu mandereh danum pananggak rundung hapamantai tambun.

Tinai uka ikei tau belum tatau sanang haring manggigih tingkah lawang baun andau. Akam masi mawat mampahayak tuntang mangejau kare ikei handiai kare riwut peres baratus gangguranan arae sampar saribusasabutan bitie.
Mangat kare ikei handiai ije tege tingang mumpung renteng tambun randan hapampungan linkat huang ambun alem tuh sama nupi nikap kayun penyang karuhei tatau ngampa sandik paturung sangkalemu raja. Akam kia mampakeleh kare kula jalahan ikei ije buah kahaban kapehe lasut darem mampahayak kia tundah jalahan ikei ije manampa jalanae kejau akam kia mangarendeng kare paharin ikei ungkup uluh kaharingan ije hindai puji mahining auh ajar aim ije baguna akan galang pambelum ewen hajamban basarah tuh uka ewen tau barendeng pahayak ikei.

Aluh Batampulu ikei balaku asi belum dengam kueh bitim tau rise rawei hankahanya ikei palakuan awat maharing isen balitam dia tau basule huang.
Basa tawangku bitim puna Raja ije mahunjun bara kare Raja Awang beken balitam kuasam jatun bara tikas kuasam tunang bitim tampung sahur bara gantung langit tundun parapah bara tuyang hawun.
Dia panjang riwut rawei hajamban bahing ganan tandak isen ambu saruhin tisui babalang labatan ganan kandayung eleh manting nduan tahanjungae palus nyelem mijen panyalampayae.
Palus buli ganan tandak buli batambang salumpuk entang mules labatan kandayungku mulang tantakep tanterus tuyang.

Palus buli hayak ganan tandak buli bulau pantar tatah mules lepah labatan kandayungku nyuruk rabia sadurin guntum ruwan junjun helu.
Kuruk hambaruan ikei buli,buli nyelem bangkusan timpung mangat hariten halawu benteng,barintih nduan hila upun tundue buli hayak kapitar kaharati panyalembang untek panarang atei parentas rawei paharus jalan parajang hukum.

Huang Aram tuntang Kuasam ikei balaku

SAHIY.

 

Ref: Buku Kandayu (Telatah Basarah)

Doa Panutup Basarah

 

 

 

Inanjuriku ganan tandak balua bulau pantar tatah bahanjung rabia sadurin guntum.
Bahi-bahing panganak andau balua parung hai malabehu benteng siru datuh marantau ruang ije gantung pahalendang tinggi pahalingei ruwan parung jatta balawang bulau sirun kanaruhan bapager hintan.

Bambahingan Panyandai Bulau palus nyalumbu ambun tilap telu puluh manangkawet enun lime balas hatalamping. Palus Tapuk Tasik kapanjungan manjung halawu tumbang lawang langit.

Kankarungut ganan tandak namuei tukang uju lawang langit uju nanjung inangkalau. Eleh tasik malambung bulau herende laut bapatah hintan palus murik batang danum mendeng ngatimbung langit nanturung pahalendang balai bulau napatah hintan Sali padadusan Ranying Hatalla Langit Tuhan tambing kabanteran bulan raja tuntung matan andau ije hai kuasae belum datuh japa jimat maharing.
Kangkarungut tinai ganan tandak janjaruman karangan ikei tingang esum pantai danum kalunen nalatai tisui luwuk kampungan bunu.
Basa nduan hambekan katun ikei haya-hayak handak manutup pumpung basarah ikei tuh mahapan Do,a ikei huang aram tuntang kuasam ije hai. Mangat bitim tau mujan danum kaharingan belum natisan guhung panaling aseng akan ikei handiai ije tege huang ambun alem/andau tuh palus akan kare tundah jalahan ikei ije melai huang huma tuntang nggawi jalanae kejau.

Uka awi asim tuntang sintam ikei tau i-awat tuntang halajur ingat kakare auh aim akan galang pambelum ikei intu huang batang danum injam tingang tuh mangat ikei halajur tau penyang hije simpei paturung humba tamburak uka ikei tau tanggeran lewu mandereh danum pananggak rundung hapamantai tambun.

Mangat ikei tau belum hatampung kilau bua kayun sangalang garing haring hatundun tingkah bau kayun lampesung kereng.
Ngatah tinai bitim Ranying Hatalla Langit Tuhan tambing kabanteran bulan raja tuntung matan andau akam mangejau ikei handiai bara kare taluh ije papa,peres badi baratus gangguranan arae sampar saribu sasabutan bitie. Akam manenga tangkalasan kasingen lewu mandereh danum kahirin rundung hapamantai tambun akan ikei belum panju-panjung kilau pisang tanggan tarung tatau sanang ureh ngalawan kilau asang suhun danum raja manggigih tingkah lawang baun andau basa bitim puna tawan ikei raja ije mahunjun kakare raja awang beken kuasam balitam jatun bara tikas kuasam.

Dia panjang riwut rawei hajamban bahing ganan tandak isen ambun saruhin tisui babalang labatan ganan kandayung eleh manting nduan tahanjungae palus nendemijen panyalampayae. Palus Buli Ganan tandak buli batambang salumpuk entang mules lepah labatan ganan kandayung mulang tantakep tanterus tuyang.

Buli hayak ganan tandak buli bulau pantar tatah mules lepah ganan kandayung nyuruk rabia sadurin guntum ruwan junjun helu.
Kuruk hambaruan ikei buli. buli nyelem bungkusan timpung mangat hariten halawu benteng, uka barintih halahu upun tundue, buli hayak panyalembang untek panarang atei, parentas rawei parajang hukum buli hayak kayun penyang karuhei tatau sandik paturung sangkalemu raja, Hajamban Kuasan Ranying Hatalla Ikey Balaku

SAHIY.

Ref: Buku Kandayu (Telatah Basarah)